Dy avionë amerikanë B-52 janë parë sot në qiellin e kryeqytetit shqiptar.
Bombarduesit amerikanë kanë dhuruar shfaqje mbi sheshin Skënderbej në Tiranë rreth orës 15:00 në kuadër të 100-vjetorit të marrëdhënieve mes Shqipërisë dhe Shteteve të Bashkuara.
Kryeministri i Shqipërisë Edi Rama ka postuar një video ku shihet shfaqja e bombardueve amerikanë.
“Dy prej avionëve bombardues më të mëdhenj të ushtrisë amerikane, bishat B52, kryen sot një fluturim përshëndetës mbi Tiranë, në kuadër të 100-vjetorit të marrëdhënieve mes Shqipërisë dhe Shteteve të Bashkuara”, ka përshkruar Rama videon e parakalimit të aeroplanëve.
Ndërsa ambasadorja e SHBA-ve në Shqipëri, Yuri Kim, tha se këta avionë, nga më të mëdhenjtë në ushtrinë e SHBA-ve, kryen një fluturim ushtrimor në rajon, mbi disa vende, duke përfshirë edhe Shqipërinë. “Marrëdhëniet e mbrojtjes, aleanca jonë me Shqipërinë është jashtëzakonisht e rëndësishme. Ne qëndrojmë gjithmonë përkrah aleatit tonë të NATO-s”, – tha ambasadorja Kim. Këtë vit është shënuar me një seri veprimtarish 100 vjetori i marrëdhënieve diplomatike midis Shteteve të Bashkuara dhe Shqipërisë.
