Me një ceremoni është shënuar fillimi i punës së Doganës së Kosovës në Portin e Durrësit, me ç’rast është thënë se ky është hapi shumë i rëndësishëm drejt bashkimit të plotë doganor në mes Kosovës dhe Shqipërisë.
Hapja e zyrës doganore në Portin e Durrësit ishte si vendim që ka dalë nga mbledhja e dy qeverive mbajtur në Pejë të vitit të kaluar.
Me këtë rast, kryeministri i Shqipërisë, Edi Rama, ka thënë se puna për integrimin e kufijve sipas modelit Shengen ka filluar dhe do të përfundojë shumë shpejt.
Rama tha se në pranverë do të ketë një kufi fluid në mes të dyja vendeve dhe se do të donte që kjo praktikë të ndiqet edhe për Maqedoninë dhe Malin e Zi.
Ai tha se nuk ka Shqipëri të madhe, por ka një komb shqiptar.
“Më vjen shumë mirë që sot ne mblidhemi në një stacion tjetër të rrugëtimit tonë. Për të hapur zyrën doganore të Kosovës në Durrës dhe për ta kthyer portin e Durrësit edhe në një doganë të Kosovës. dogana e Kosovës këtu në Durrës është hapi i parë drejt bashkimit të plotë doganor të dy vendet. Integrimi kufitar sipas modelit Shengen. Sistemin Shengen, që do të thotë tani jemi vetëm në një kontrollë, nga dy pika kemi një, kjo do të zgjasë edhe për pak kohë si procedurë, sepse në pranverë do të kemi një kufi fluid. Ne duam që këtë sistem ta vendosim edhe me Maqedoninë, edhe me Malin e Zi. Shqipëria e madhe është një sajesë e armiqve, nuk ka Shqipëri të madhe, ka një komb shqiptar”, tha Rama.
Kurse, zëvendëskryeministri i Kosovës, Fatmir Limaj, i cili është edhe koordinator kombëtar i dy qeverive tha hapja e pikës doganore të Kosovës në Portin e Durrësit, është projekti i dytë më i rëndësishëm, pas Rrugës së Kombit.
“Sot është një moment i rëndësishëm i thellimit të bashkëpunimit. Besoj që ky është projekti i dytë më i rëndësishëm që pas shpalljes së pavarësisë, pas atij për ndërtimin e autostradës. Nga katër vendime që ka marrë në Pejë dy qeveritë dhe kjo është e dyta që po realizohet. E para është pikat e përbashkëta kufitare dhe e dyta është kjo. Kjo tregon se ne takimet e përbashkëta nuk janë ashtu siç janë quajtur, por kemi kaluar në veprime konkrete. Hapja e kësaj zyre është lajm i mirë për të dyja vendet. Nga sot Kosova e ka portin e saj, si qendër e rëndësishme të zhvillimit ekonomik”, tha Limaj. /Telegrafi/