Kryeministri shqiptar Edi Rama, teksa foli në takimin me shqiptarët në Milano, u shpreh se ata vijnë sot në Shqipëri në një vend krejt ndryshe nga ai që kanë lënë kur kanë ikur vite më parë nga “sytë-këmbët”.
Sipas Ramës, koha e mirë e Shqipërisë më në fund ka ardhur dhe vetëm ne shqiptarët, brenda dhe jashtë kufijve të saj, mund dhe do ta bëjmë këtë kohë, një kohë që do të shënjohet në historinë e kohës sonë, siç është koha e ribashkimit përfundimtar me familjen evropiane.
“Po i them atij që do të besoj te Shqipëria e sotme, Shqipëria e nesërme do t’ia kthejë shumëfish besimin. Këtu është e mundur që njerëzit të jenë njëkohësisht banorë të ishullit dhe të kontinentit dhe t’i qëndrojnë larg të këqijave që vijnë nga të dyja, duke gëzuar si njërin, si tjetrin.
Për çdo të huaj në pragun e shtëpisë së shqiptarit, ju vini sot në një Shqipëri që është shumë ndryshe nga ajo ku ikët nga “sytë-këmbët”.
Mos e harroni pikërisht pse ajo është e tillë, ka edhe shumë mundësi për këdo që kthehet me dijet, me eksperiencën, me kursimet e veta dhe që duke pasur mësuar guximin, do të fitojë për veten dhe familjen më shumë sesa ata që ngurrojnë e që mendohen e presin që ta gjejnë gati.
Ai që do të kthehet më shpejt, do të ketë më shumë vite përpara për shpirtin e ndarë në dysh, por ju nuk jeni aspak të detyruar të zgjidhni o njërën, o tjetrën, sepse sot ju keni mundësinë ti përkisni të dyjave.
Askush më mirë se ju nuk ia di fjalës punë, parasë së fituar e të kursyer me shumë sakrifica, në një vend që deri dje ishte i huaj, e sot është edhe i juaji.
Koha e mirë e Shqipërisë më në fund ka ardhur dhe vetëm ne shqiptarët, brenda dhe jashtë kufijve të saj, mund dhe do ta bëjmë këtë kohë, një kohë që do të shënjohet në historinë e kohës sonë, siç është koha e ribashkimit përfundimtar me familjen evropiane.”, deklaroi Rama në fund të fjalës së tij, të cilën e mbylli me fjalët: “Rroftë Shqipëria, Viva l’Italia”./A2 CNN
