Takimi mes Edi Ramës dhe Lulzim Bashës i cili u diskutua të mbahet këtë javë, është shtyrë për javën e dytë të qershorit, për shkak të përjashtimit me 10 ditë nga parlamenti i Sali Berishës. Megjithatë, komunikimi nuk u ndërpre nga ky vendim. Demokratët nuk e pranuan si vendtakim të përshtatshëm sallën e hartave në Kryeministri, e as propozimin e parë të qeverisë që takimi të kryhej këtë të enjte. Kjo do të ishte një ditë që rivalizonte atë të seancës plenare, që demokratët kishin marrë vendim për ta bojkotuar. Të hënën, të dyja palët ranë dakord në parim me propozimin e Kryeministrisë, që takimi të zhvillohet më 6 qershor, ora 17:00, te Pallati i Kongreseve. Por kjo është vetëm në parim. Mësohet se stafet e dy partive nuk kanë komunikuar që nga e hëna për të caktuar modalitetet thelbësore: formatin e takimit dhe axhendën e tij, siç ka kërkuar stafi i kryetarit të Partisë Demokratike.
Ekspertë të opozitës që kanë marrë pjesë në takime të ngjashme, si ai i arritjes së marrëveshjes së 2002-shit mes Fatos Nanos dhe Sali Berishës, thonë se takime të këtij niveli kërkojnë një përgatitje shumë të mirë, madje edhe me draft marrëveshje të rakorduar paraprakisht. Një rol të tillë atëherë e kanë kryer ambasadorët e OSBE-së dhe Këshillit të Europës, Geert Ahrens dhe Jorgen Grunet, ndërsa tani, pjesën e vështirë të negociatave paraprake po e kryen ambasadori amerikan Donald Lu. Në lojë janë dy drafte paralele për Reformën në Drejtësi, si dhe ajo që opozita e quan prioritetin numër 1 të saj, Reformën Zgjedhore me votimin dhe numërimin elektronik. Takimi i mundshëm Rama- Basha, i cili ka ngjallur diskutime të ndryshme prej disa ditësh ka ndarë Partinë Demokratike në pro dhe kundër. Ish-kryetari i PD-së Tritan Shehu e konsideron pozitiv dhe normal një takim të tillë politik. “Gjithmonë kam qenë e jam për dialog e kontakte politike, të çdo niveli.
Një praktikë e tillë ka qenë pjesë e filozofisë së PD-së edhe në momentet më të vështira për vendin e tensionet më të larta midis aktorëve politikë te ne, siç ishte viti ‘97. Efektet e këtyre takimeve dhe kontakteve në shumicën e rasteve kanë qenë pozitive. PS e viteve të fundit është shmangur nga tryeza politike çështjeve madhore të vendit, për t’ia “deleguar” ato ekspertëve, lidhur kjo me mungesë vullneti politik dhe përfshirje të saj nga komplekset. Unë gjykoj se këto takime e kontakte nuk kanë pse të konsiderohen si evenimente madhore, nuk kanë pse të mistifikohen, janë veçse pjesë e punës, aktivitetit politik që mbështetet mbi dialogun. E rëndësishme është që veçanërisht takimet publike të paraprihen nga një përgatitje serioze e konkrete, gjë që lidhet direkt me rezultatin tij. Dua të theksoj se ky takim potencial nuk zbeh aspak skandalet e problemet ku është përfshirë “kampi i majtë” në vazhdim dhe së fundmi”, tha Shehu.