Pas prezantimit në Teatrin Kombëtar Eksperimental në Tiranë me 18 janar 2019, monodrama “Artisti i vetëm”, më 26 janar 2019, nga ora 19:00, do të shfaqet në Teatrin e Qytetit të Prishtinës – “Dodona”.
Te kjo monodramë luan Naim Berisha, i cili e ka bërë edhe regjinë. Ndërkaq, në reprizën e planifikuar për Prishtinë, i pranishëm do të jetë edhe autori i monodramës, Ralph Hammerthaler.
“Artisti i vetëm”, trajton dramën e brendshme të një artisti të madh, i cili për shkak të degradimit të artit dhe shijes se publikut, përjashtohet nga shoqëria me dhunë, për t’u vënë në situatë të skajshme jetësore dhe ekzistenciale.
Personazhi Hans Klip, gjatë prezantimit të tij të fundit para publikut, rrëfen jetën e tij, momentet kultminante artistike në të kaluarën dhe dramën e tij në të tashmen. Në fund të tekstit, largohet nga arti i tij dhe nga vetvetja, duke renë në humnerën e pakthyeshme të dëshpërimit. /Telegrafi/
