Drejtori Grupit për kërkime politike, Naim Rashiti në tryezën e organizuar për të arriturat e dialogut teknik Kosovë-Serbi ka bërë të ditur se kanë mbledhur material nga autorë të ndryshëm, për marrëveshjet e arritura gjatë dialogut teknik Kosovë-Serbi, ku është bërë më e qartë për qytetarët e Republikës së Kosovës për të mirat e këtyre marrëveshjeve.
Gazmir Raci, njëri nga autorët që ka kontribuuar në mbledhjen e këtyre shkrimeve, ka thënë se gjatë dialogut teknik me Serbinë, është mundësuar edhe bashkëpunimi në Dogana, ku mallrat e ushqimet tash i nënshtrohen kontrolleve të agjencive të Kosovës.
“Kosova dhe Serbia i kanë pikat e kalimit të vendosura dhe bashkëpunimin e vendosur, tashmë kemi zyrtarë doganor të Kosovës, të cilët kujdesen për mallrat dhe ushqimet, prandaj kjo marrëveshje ishte ndër më të rëndësishmet. Me vendosje e policisë së Kosovës, zyrtarëve doganor dhe të gjitha mallrat i nënshtrohen kontrollit doganor”, tha Raci.
Ai përmendi edhe kodin telefonik, të cilin e quajti edhe njërën ndër të arriturat kryesore.
“Kodi telefonik është një ndër të arriturat kryesore, është diçka që na po e prekim e po e përjetojmë”, u shpreh Raci.
Në anën tjetër, Naim Rashiti ka thënë se gjatë mbledhjes së materialeve për dialogun teknik Kosovë-Serbi, kanë takuar shumë persona që kanë qenë pjesë e nënshkrimit të marrëveshjeve të ndryshme teknike në të kaluarën, nga të cilët kanë kërkuar të shpalosin më shumë detaje në lidhje me dobitë nga procesi i dialogut.
“Kur kërkonim autor të cilët kanë qenë pjesë e nënshkrimit të marrëveshjeve, gjenim plot që kishin bërë marrëveshje, por që kishte kaluar shumë kohë sepse nuk e dinin se si ishte situata atëherë dhe nuk ju kujtohet. Ata refuzonin të shkruanin për shkak se nuk ju kujtohej si kishte qenë puna e dialogut teknik, para dhe pas marrëveshjes”, u shpreh Rashiti.
Rashiti tha se kanë përmbledhur përvojat e personave të përfshirë në dialog teknik, për ta bërë më të lehtë për qytetarët që ta kuptojnë dialogun teknik.
“Jemi falënderues që këta 18 autorë kanë shkruar ato që dinë për marrëveshjet dhe për përfitimet që kanë ardhur nga këto marrëveshje. Këto shkrime kanë një qëllim, që të afrojnë një informatë më të mirë e më të drejtë njerëzve, për të kuptuar më mirë se çka në realitet dhe si i shohin njerëzit marrëveshjet mes shteteve”, u shpreh Rashiti. /Telegrafi/