Edhe kryetari i Komunës së Mitrovicës, Agim Bahtiri po ndjek me interes të veçantë debatet për dialogun me Serbinë.
Ai përmes një deklarate të hapur u ka bërë thirrje liderëve politikë në Kosovë, që të mblidhen në një tryezë ku temë kryesore për diskutim të jetë Dialogu me Serbinë.
Ditë më parë Bahtiri kishte organizuar një tryezë tjetër të ngjashme me përfaqësues të partive politike, ku është kundërshtuar shkëmbimi i territoreve me Serbinë.
Bahtiri ka marrë mbështetje edhe nga komunat fqinje të Mitrovicës, që janë Vushtrria, Skenderaj dhe Drenasi, për çështjen në fjalë, përcjell Telegrafi.
Bahtiri thotë se meqë qyteti i Mitrovicës është i lidhur ngushtë me këtë proces, ai fton liderët e partive parlamentare që të mblidhen në këtë qytet për të diskutuar për dialogun, pasi sipas tij “neve si klasë politike na obligon të jemi të përgatitur plotësisht”.
Më poshtë ftesa e Bahtirit drejtuar liderëve të institucioneve shtetërore dhe të partive politike
Të nderuar liderë të institucioneve shtetërore dhe të partive politike,
Ditët që po i kalojmë nën ombrellën e temës së dialogut me Serbinë, nëntemat që do të fliten dhe procesi që do të zhvillohet, neve si klasë politike na obligon të jemi të përgatitur plotësisht.
Duke pasur parasysh se qyteti i Mitrovicës lidhet ngusht me këtë proces, unë si Kryetar i Komunës i bëj thirrje publike të gjithë krerëve partiakë që përfaqesohen në Kuvendin e Republikës së Kosovës të marrin pjesë në një tryezë të përbashkët me datën 23.08.2018 në ora 11:00 në ambientet e Komunës së Mitrovicës, e që si temë kryesore do të jetë Dialogu me Serbinë.
Unë besoj shumë që secili prej jush është i angazhuar politikisht për zgjidhjen më të mirë të kësaj sfide dhe për atë arsye jam i bindur që do t’i përgjigjeni pozitivisht ftesës sime.