Publikimi i videos ku shfaqet i dyshuari për vrasjen e komisarit Artan Cuku, duke ikur nga vendi i krimit, ka sjellë një “lumë telefonatash” në Policinë e Tiranës.
Gjatë 24 orëve që pasuan publikimin e pamjeve filmike të personit të dyshuar, policia ka marrë në sallën operative të paktën dy telefonata në orë për këtë rast.
Lajmi u bë me dije nga burime të Policisë së Tiranës, të cilat thanë se qytetarët kanë dhënë informacionet që kishin në lidhje me atentatin e rëndë ku humbi jetën ish-drejtori i Policisë së Vlorës, komisar Artan Cuku. Telefonuesit më të shumtë në numrin 0694110299 i kanë dhënë policisë informacione dytësore, që kanë të bëjnë me lëvizjet e personit të dyshuar.
“Disa prej telefonuesve pretendojnë se e kanë parë personin duke vrapuar, në një kohë që përkon me disa minuta pasi kishte ndodhur vrasja”, thanë burimet e Policisë.
Sipas tyre, qytetarë të tjerë që kanë telefonuar pretendojnë se e kanë parë të dyshuarin, por orari që ata kanë dhënë përkon me kohën 30 minuta apo një orë para se të kryhej vrasja me pesë plumba e Artan Cukut te pallati ku banonte në Rrugën e Kosovarëve, pranë Gardës së Republikës.
Burimet policore kanë thënë se një numër më i kufizuar personash që telefonuan në numrin në dispozicion kanë pretenduar se e njohin personin në video dhe kanë dhënë edhe identitetin e tij.
Mësohet se policia po i verifikon emrat e dhënë, ndërkohë që bëhet me dije se identitetet që kanë dhënë qytetarët përkojnë me persona që kanë precedentë të fortë penalë e madje edhe me shtetas në kërkim për vepra të rënda penale.
Hetimet
Policia e Tiranës i ka fokusuar hetimet e veta në disa pista kryesore në lidhje me vrasjen e komisarit Artan Cuku.
Më kryesorja për policinë është pista e hakmarrjes, ndërsa në hetim është edhe versioni i vrasjes për shkak të detyrës së Artan Cukut si drejtor policie në Vlorë në 2012 dhe zv.drejtor policie në Tiranë.
Dosja ndodhet në Prokurorinë e Krimeve të Rënda, e cila po drejton hetimet, por deri tani vlerësohet se provat e grumbulluara janë të pamjaftueshme për kapjen e autorëve të ngjarjes së rëndë, apo edhe për përcaktimin e shkakut të atentatit.
Deri ditën e djeshme në polici janë shoqëruar e marrë në pyetje rreth 35 persona të dyshuar dhe shtetas me dijeni për ngjarjen. Ata janë lënë të lirë për shkak të mungesës së provave për implikimin e tyre në atentatin ndaj ish-zyrtarit të policisë, i cili u ekzekutua në katin e parë të pallatit ku banonte në Tiranë.
Dy ditë më parë, policia publikoi një video të personit të dyshuar si vrasës. Videoja u përket pamjeve të marra nga një kamera në zonën ku ndodhi krimi, ndërsa personi që kalon aty përputhet në veshje e karakteristika fizike me shtetasin e filmuar pas krimit nga kamerat pranë pallatit ku u vra Artan Cuku. /Panorama/
