Derisa Instituti Kombëtar i Shëndetit Publik kërkon nga qytetarët që të kenë kujdes dhe të mos dalin gjatë natës në qytet për shkak të ndotjes së ajrit, Ministria e Mjedisit thotë se gjendja nuk është shumë alarmante.
Ka ditë që Instituti Kombëtar i Shëndetit Publik po bënë thirrje që qytetarët të mos dalin gjatë natës në qytet, madje të mos i hapin as dritaret për ajrosje.
Madje alarmojnë se nëse nuk merren masa urgjente, do të ketë efekte negative në dëmtimin e shëndetit dhe rritje të vdekshmërisë nga sëmundjet kardiovaskulare dhe respiratore.
Por, këtë e mohon ministri i Mjedisit dhe Planifikimit Hapësinor, Fatmir Matoshi. Tha se gjendja nuk është alarmante.
“Nuk kemi pasur një gjendje të atillë që të mos hapen dritaret. Unë u besoj stacioneve që bëjnë matjen e ajrit. Nga të dhënat e marra gjendja nuk ka qenë e tillë çfarë është raportuar as për së afërmi, se gjoja njerëzit duhet të mbyllen në shtëpi”, tha ministri Fatmir Matoshi.
Megjithatë, qytetarët thonë se ajrin po e ndjejnë të ndotur dhe se kanë filluar të mos dalin gjatë natës kur niveli i ndotjes së ajrit është më i lartë.
“Ajri i ndotur po na pengon shumë. Ajri është shumë i ndotur”, tha qytetarja Arta Dedumja.
Një qytetar tjetër thotë se është bërë e vështirë jeta në këtë gjendje.
“Mjerë për ne që jena gjallë. S’ka kush që kujdeset për këtë popull” shprehet qytetari tjetër Rrahman Tahiri.
Ndërsa qytetari Isuf Zeneli, thotë se gjatë ditës nuk kemi qare pa dalë në punë, por atëherë kur ka mundësi i eviton daljet.
“Zakonisht nuk dalë nga shtëpia, sepse e di se ndotja është e madhe. Mbrëmjeve dhe mëngjeseve po reflektohet ndotja më shumë, por gjatë ditës nuk po ka qare pa ardhur në punë”, tha Isuf Zeneli.
Viteve të fundit, Kosova është ranguar ndër vendet me nivel më të lartë të ndotjes së ajrit./ Telegrafi