Edhe pse kanë mbetur vetëm 1 javë për fillimin e vitit shkollor, MASh nuk ka vendosur ende se si do të mbahet ky proces.
Qytetarët po vlerësojnë se më 1 shtator fëmijët duhet të kthehen në bankat shkollore, derisa kundërshtojnë vazhdimin e mbajtjen së mësimit “online”.
Ata madje thonë se fillimi i procesit mësimor duhet të realizohet me kapacitete të plota, pa orar të shkurtuar.
Qytetari Dilaver Kryeziu, thotë se pavarësisht situatës së krijuar me Covid-19, fëmijët duhet të fillojnë procesin mësimor.
Sipas tij vetëm në ketë mënyrë do të ketë arsimim të mirëfilltë.
“Gjithsesi duhet me u kthye në qoftë se doni me pas tamam një arsimim me dinjitet, një arsimim që na takon neve e sidomos fëmijëve”, thotë ai.
Qytetari tjetër, Naim Bytyqi, kthimin e nxënësve në bankat shkollore e sheh si zgjidhje adekuate. Derisa theksoi se fillimi i procesit mësimor duhet të bëhet ma kapacitete të plota, pa orar të shkurtuar.
Mendim të njëjtë ndan edhe Rifat Ejupi, i cili pretendon se fëmijët kanë imunitet të mjaftueshëm dhe se nuk janë të rrezikuar nga virusi.
Kurse, Fadil Gashi thotë se çështja e kthimit apo jo të fëmijëve në shkolla nuk duhet të diskutohet.
Për të mësimi fitohet vetëm në këtë institucion dhe jo në platforma “online”.
“Po me siguri duhet se mësimi më i mirë bëhet nëpër shkolla, jo nëpër shtëpi. Për rrezik, varet qysh e ka pa OBSH-ja,…”, thotë Gashi.
Për Xhevat Hoxhën, kthimi në shkolla do të ishte vendim adekuat, për faktin se siç deklaroi ai, shumë fëmijë nuk kanë mundësi të ndjekin mësimin “online”.
Kurse, Mirsad Krasniqi, po vlerëson se me kujdes të shtuar fëmijët duhet të kthehen në bankat shkollore.
Ministria e Arsimit dhe Shkencës ka paraparë fillimin e vitit të ri shkollor sipas tre skenarëve, ku skenari A përfshin mësimin me prezencë në institucionet shkollore me masat parandaluese, skenari B nënkupton rikthimin e pjesshëm me mësim të kombinuar-prezencë dhe mësim në distancë dhe skenari C mësimi në distancë. /kp/Telegrafi/