Në Klinikën e Kardiologjisë, shërbimin e Elektrostimulimit dhe Elektrofiziologjisë, filloi për herë të parë procedura diagnostike dhe terapeutike e studimit elektrofiziologjik me ablacion.
Siç njoftohet, kjo procedurë e rëndësishme intervente me një aparaturë bashkëkohore dhe angazhim maksimal të stafit tonë të specializuar hapi një etapë të re në Klinikën e Kardiologjisë dhe trajtimin e pacientëve me aritmi kardiake.
“Janë punuar gjithsejtë 5 raste me çrregullime supraventrikulare të ritmit, prej të cilëve 3 raste me AVNRT tipike dhe 2 raste me sindromë parangacmimi dhe rrugë acesore përçimi (WPW)”, thuhet në njoftim.
Më tej theksohet se rastet janë punuar nga specialistët tonë të fushës Dr.Edmond Haliti dhe Dr. Xhevdet Krasniqi, nën mbikqyrje (proktorship) nga eksperti i jashtëm Prof. Vassil Traykov nga Bullgaria, si dhe me përkrahjen e çmuar të menaxhmentit dhe angazhimin maksimal të stafit infermieror të shērbimit përkatës.
“Të gjitha rastet kanë përfunduar me sukses dhe pa komplikime”, thuhet në fund./Telegrafi/