Më shumë se 430 njerëz kanë vdekur nga kolera muajin e kaluar, ka njoftuar Ministria e Shëndetësisë e Sudanit, ndërsa lufta vazhdon të shkatërrojë vendin.
Bëhet e ditur se numri i infeksioneve është rritur në rreth 14,000.
Ministria ka deklaruar se po bën gjithçka që mundet për të “luftuar kolerën në shtetet e prekura”.
Marrja e trajtimit në zonat e prekura është jashtëzakonisht e komplikuar nga konflikti i cili ka vrarë deri në 150,000 njerëz që nga fillimi i vitit të kaluar, sipas të dërguarit special të SHBA-së për Sudanin, Tom Perriello.
Siç raportohet, Sudani është përfshirë në një luftë që kur ushtria dhe një grup i fuqishëm paraushtarak, Forcat e Mbështetjes së Shpejtë (RSF), filluan një luftë të egër për pushtet në prill të vitit 2023, duke çuar në atë që OKB-ja e ka quajtur një nga krizat më të këqija humanitare në botë, shkruan BBC, përcjell Telegrafi.
Mbi nëntë milionë njerëz janë detyruar të largohen nga shtëpitë e tyre dhe ekziston frika e një urie të përhapur pasi njerëzit nuk kanë qenë në gjendje të kultivojnë asnjë kulturë.
Gjithashtu, ka pasur paralajmërime për një gjenocid të mundshëm kundër joarabëve në rajonin perëndimor të Darfurit.
Ndryshe, kolera është një sëmundje me zhvillim të shpejtë dhe shumë ngjitëse.
Sipas Organizatës Botërore të Shëndetësisë (OBSH), ajo mund të shkaktojë diarre, dehidrim dhe vdekje.
Është relativisht e lehtë për t’u kuruar, por trajtimi i shpejtë është thelbësor.
Si lufta, ashtu edhe reshjet e dendura të shiut dhe përmbytjet kanë kontribuar në shpërthimin e kolerës, të shoqëruar nga grumbullimi në kampet e zhvendosjes. /Telegrafi/