Afati për aplikim për njohjen dhe verifikimin e statusit të viktimës së dhunës seksuale gjatë luftës së fundit në Kosovë, është zgjatur edhe për dy vjet.
Vendimi është marrë në mbledhjen e Qeverisë të mërkurën, raporton Telegrafi.
Shtyrja e afatit për aplikim është bërë përmes miratimit të projektligjit për ndryshimin dhe plotësimin e Ligjit për Statusin dhe të Drejtat e Dëshmorëve, Invalidëve, Veteranëve, Pjesëtarëve të Ushtrisë Çlirimtare të Kosovës, Personat e dhunuar gjatë luftës, Viktimave Civile dhe Familjarëve të tyre.
Kryeministri i vendit, Albin Kurti, u bëri thirrje të gjithë të mbijetuarve të dhunës seksuale gjatë luftës që aplikojnë dhe të realizojnë të drejtën e tyre të garantuar me ligj në një proces që siç tha ai, është konfidencial.
Para kabinetit qeveritar, kreu i ekzekutivit u shpreh se të mbijetuarit e dhunës seksuale kanë nevojë për përkrahje shoqërore dhe drejtësi.
Ndërsa, Ministri i Financave, Hekuran Murati, tha se me këtë ligj afati për aplikim për të gjithë personat që kanë përjetuar dhunë seksuale gjatë luftës së fundit është zgjatur deri më 15 maj 2025.
“Duke konsideruar ndjeshmërinë e trajtimit të rasteve, kemi vlerësuar që ky afat duhet të shtyhet edhe për dy vite të tjera, më konkretisht deri më 15 maj 2025”, deklaroi Murati.
Ndryshe, gjatë luftës së fundit në Kosovë dhunimet seksuale të burrave, grave e fëmijëve, u përdorën si mjet lufte nga forcat ushtarake, jo ushtarake e policore të Serbisë. Numri i saktë i personave që u përdhunuan gjatë luftës nuk dihet, por sipas raporteve të organizatave relevante, vendore e ndërkombëtare, besohet të jetë rreth 20 mijë. Ndërkohë, deri tani statusi i viktimës u është njohur një mijë e 217 grave dhe 57 burrave. /Telegrafi/