Kompanitë e linjave të transportit urban në Shqipëri do të kompensohen për naftën me 100 lekë [0.82 euro] për litër, në mënyrë që të mos rritet çmimi i biletës për qytetarët, tha sot Ministrja e Infrastrukturës dhe Energjisë, Belinda Balluku.
Kompensimi do të zgjasë për tre muaj me radhë, ka shtuar ministrja në një komunikim me gazetarët pas mbledhjes së qeverisë.
“Me anë të kësaj pakete, po mundohet që të ruajnë çmimin e biletës. Nuk do lejojmë rritjen e biletës për shkak të masave të marra. Këto masa janë afatshkurta, por po punojmë edhe për zgjidhje afatgjata, siç është përmirësimi i flotës”, tha Balluku.
Një tjetër vendim i qeverisë në lidhje me transportin është nxjerrja e biletave elektronik.
Biletat tashmë do të priten online, përmes sistemit të fiskalizuar, shtoi Balluku. /Telegrafi/
