Banka Evropiane për Investim dhe Banka Islamike e Zhvillimit do të financojnë tërësisht autostradën Tiranë-Elbasan. BERZH është angazhuar se do të financojë projektin Qafë-Pllocë – Librazhd. BERZH së bashku me Bankën Islamike dhe Fondi Opek do të financojnë rrugët rurale.
Për rrugët rurale mund të japë kredi të buta edhe qeveria japoneze. Banka Gjermane e Zhvillimit (KFW) ka marrë përsipër linjë e interkonjeksionit midis Tiranës dhe Prishtinës dhe sipas kryeministrit, po konsideron me përparësi linjën e interkonjeksionit me Shkupin. Po ashtu, e njëjta bankë ka angazhuar fonde për një turbinë të re në hidrocentralin e Vaut të Dejës. Banka e Detit të Zi merr përsipër financimin e Rrugës së Arbrit.
Fondet e Gjirit marrin përsipër financimin e boshtit të jugut. Kurse qeveria austriake jep një kredi të butë për modernizimin me teknologjinë e fundit të 6 spitaleve. Sipas kryeministrit, këto kredi në shumën e 3.2 miliardë eurove, tregojnë besimin e institucioneve financiare ndërkombëtare te ekonomia shqiptare.
“Kreditoj do të thotë para së gjithash, besoj. Në qoftë se diku ka krizë besimi, ekziston besim i plotë ndaj ekonomisë dhe qeverisë shqiptare. Një faktor shtesë madhor ishte mesazhi që dërguam me ristrukturimin e buxhetit. Miqtë dhe partnerët tanë financiarë e kanë pritur në mënyrë të shkëlqyer, si dëshmi e seriozitetit të kësaj qeverie”, ka thënë Berisha.
Sipas kryeministrit, një faktor shtesë që u vlerësua nga partnerët financiarë të qeverisë, ishte edhe ristrukturimi i fundit i buxhetit. /tch/telegrafi/