Të premten më së largu pritet që minatorët e Trepçës ta marrin pagën e tetorit.
Lajmin për Telegrafin e ka bërë të ditur drejtori i Njësisë për Politika dhe Monitorim të Ndërmarrjeve Publike, Besnik Krasniqi.
Krasniqi ka thënë se dje janë informuar se është marrë urdhri për bartjen e mjeteve nga Ministria e Financave në Ministrinë e Zhvillimit Ekonomik.
“Menaxhmeti dhe Sindikata e Trepçës e dinë procedurën për bartjen e mjeteve. Deri nesër më së largu do t’i kenë paratë në llogari. Janë 1.1 milionë euro, 1 milion dalin sot ose nesër dhe 100 mijë dalin gjatë javës. Qeveria e Kosovës këtë vit përveç 1.1 milionë euro e ka subvencioni Trepçën edhe me 7.2 milionë euro në subvencione dhe investime kapitale dhe pjesën tjetër në kuadër të Pakos për Rimëkëmbje”, tha Krasniqi.
Punëtorët e kombinatit Trepça që nga mbrëmë janë duke vazhduar grevën, me arsyetimin se ata nuk kanë marrë ende pagën e muajit tetor.
Kurse, sot ka dhënë dorëheqje ushtruesi i detyrës së kryeshefit të Trepçës, Hysen Vrajolli.
Ndryshe, Qeveria e Kosovës në fillim të javës kishte marr vendim që Trepçës t’i ndahen 1.1 milion euro.
Ky vendim është marr pasi minatorët e minierës në Stantërg kishin ndërprerë punën në fillim të këtij muaji për shkak të mosmarrjes së pagave për muajin tetor.
Gjithashtu, disa herë punëtorët e kombinatit Trepça kanë pasur vonesa në marrjen e pagave. /Telegrafi/