Në mbledhjen e sotme, qeveria e Kosovës ka ndarë 4.5 milionë euro për Ministrinë e Mbrojtjes, të cilat janë të dedikuara për blerjen e dronëve.
Ministri i Financave, Punës dhe Transfereve Hekuran Murati, tha se këto mjete merren nga Programi i Rimëkëmbjes Ekonomike.
“Në shumën prej 4.5 milionë euro, mjetet e ndara merren nga Programi i Rimëkëmbjes Ekonomike, kategoria e shpenzimeve, subvencioneve dhe transferove, transferohen në Ministrinë e Mbrojtjes në kategorinë shpenzime kapitale në nënprogramin Forca e Sigurisë së Kosovës në projektin sistemet e armatimit sipas kërkesës së Ministrisë së Mbrojtjes”, tha ai.
Mjetet e sofistikuara ajrore do të shërbejnë për rritjen e kapaciteteve për vëzhgim dhe zbulim dhe do të blihen nga Shtetet e Bashkuara të Amerikës.
Qeveria po ashtu ka miratuar edhe kërkesën e Doganës së Kosovës për blerjen e autoblindave.