Në mbledhjen e Qeverisë sot është miratuar Projektligji për Shërbimet e Pagesave.
Ministri i Financave, Hekuran Murati, thotë se me miratimin e këtij projektligjit do të hapet rruga e integrimit të sistemit tonë financiar me zonën SEPA (Single Euro Payments Area).
“Me integrim në SEPA, bizneset dhe qytetarët tanë parashihet të kursejnë rreth 50 milionë euro në vit nga tarifat e transfereve. Çdo ditë me punë drejt lehtësimit e përmirësimit të jetës së qytetarëve”, thotë ministri.
Tutje, ai ka pohuar se Qeveria është për të gjithë.
Qeveria miratoi edhe rregulloren për procedurën e pranimit të nënpunësve të shërbimit publik në sektorin e shëndetësisë.
Në mesin e vendimeve të Qeverisë, ishte edhe ai për emërimin e Besim Kamberaj, sekretar të përgjithshëm në ministrinë e Zhvillimit Rajonal.
Ndërkaq, u nda edhe pagesa për 22 specializantë me vetëfinancim nga Lugina e Preshevës, Shqipëria dhe Mali i Zi. /Telegrafi/
