Koalicioni qeverisës gjerman është prishur: kancelari Olaf Scholz, i Social Demokratëve (SPD) ka shkarkuar ministrin e Financave, Christian Lindner të Liberalëve (FDP), shkruan euronews.
Udhëheqësit e asaj që në Gjermani njihet si “koalicioni i semaforëve” – SPD, FDP dhe të Gjelbrit – ishin mbledhur në kancelarinë në Berlin në mbrëmje, transmeton Telegrafi.
Rreth një orë pasi lajmi u publikua nga disa media, kancelari Scholz u përball me shtypin dhe kritikoi ministrin e tij të financave: “Lindner ka thyer besimin tim shumë herë”.
Ai shtoi se “nuk ka më bazë besimi për bashkëpunim të mëtejshëm”.
Udhëheqësi i FDP është “më shumë i shqetësuar për klientelën e tij dhe mbijetesën e partisë së tij”, vuri në dukje Scholz.
Takimi i liderëve të koalicionit u raportua gjerësisht si një takim “bëje ose prishe” për koalicionin, ku Lindner, në veçanti, la të kuptohej në fillim se nuk ishte shumë i shqetësuar për këtë të fundit.
Në reagimin e tij ndaj komenteve të ashpra të Scholz-it, Lindner akuzoi kancelarin për një “shpërbërje të llogaritur të koalicionit” dhe partnerët e tij të koalicionit se “as nuk pranuan” propozimet e FDP-së për kthimin e ekonomisë “si bazë për diskutim”.
Koalicioni kishte qenë në mosmarrëveshje për një kohë, me tendosje serioze në buxhetin për vitin 2025 dhe një performancë zhgënjyese nga ekonomia gjermane që nxirrte sugjerime gjithnjë e më të ndryshme se si të përballeshin dhe zgjidheshin problemet.
Shumë ligjvënës të koalicionit kishin shpresuar se pas sigurimit të presidencës së SHBA-së nga Donald Trump, grindjet e brendshme mund të liheshin mënjanë për t’u fokusuar në sfidat gjeopolitike përpara.
Kreu i SPD, Lars Klingbeil i tha transmetuesit publik gjerman ARD në mëngjes: “Unë shpresoj që të gjithë tani do të hedhin taktikat e partisë në det, se të gjithë do të shikojnë njëri-tjetrin në sy në komitetin e koalicionit këtë mbrëmje dhe të kuptojnë edhe një herë se çfarë përgjegjësie mbajnë tani”.
Analistja politike Thu Nguyen, zëvendësdrejtoreshë në qendrën Jacques Delors në Berlin, komentoi në mediat sociale:
Trump‘s election did not keep the German government from collapsing for even one day. Not sure this bodes well for those hopeful that it might shock the EU into more common action.
— Thu Nguyen (@onethuthree) November 6, 2024
Scholz konfirmoi gjithashtu se do të sjellë një votë mosbesimi në Bundestag më 15 janar, duke i hapur rrugën zgjedhjeve parlamentare deri në fund të marsit.
Robert Habeck, ministër për Ekonominë dhe Tranzicionin e Gjelbër, tha në një konferencë për shtyp në emër të të Gjelbërve se, nga këndvështrimi i tyre, “nuk ishte e nevojshme që mbrëmja të përfundonte kështu”, pasi ishin paraqitur sugjerime për një marrëveshje.
Më pas ai shtoi se, për hir të stabilitetit, “tashmë do t’i hapim me shpejtësi rrugën zgjedhjeve të reja”, duke përmbushur deri atëherë detyrat e qeverisë “në tërësinë e tyre”. /Telegrafi/
