Nuk ka asgjë më të këndshme se një miqësi e pazakontë në mes të kafshëve, dhe ne e kemi edhe një miqësi tjetër e cila do t’ua ndreq ditën tuaj – një lidhje e pazakontë në mes të një qeni me peshqit e tij.
Morty, qeni i racës “corgi” ka marrë famë në TikTok falë fiksimit të tij me peshqit “koi” në pellgun e familjes së tij. Një video e kësaj miqësie të pazakontë është parë mbi 8.8 milionë herë, me përdoruesit nga e gjithë bota të kapluar nga dashuria mes tyre.
Pronari i Morty e postoi një përmbledhje të disa videove në platformën e rrjeteve sociale, duke shfaqur admirimin e qenit për peshqit me ngjyrë të verdhë dhe portokalli që ndodheshin në pellg, përcjell Telegrafi.
Pamjet fillojnë nga filmimi i Morty i cili shikon në ujë dhe pastaj duke u endur rreth pellgut duke ndjekur peshqit. Në mbishkrimin e videos shkruhet: “Ne e pastruam pellgun tonë dhe ky ishte reagimi i Morty”, shkruan Mirror.
@mapleandmortycorgi We had our pond cleaned and this was Morty’s reaction! #dogsoftiktok #petsoftiktok #dogtok ♬ the winner takes it all – november ultra
Pronari i tij thotë: “Morty i dashuron peshqit e tij. Ai i viziton peshqit sa herë del në oborr. Ai është shumë kurioz rreth tyre. Ai madje kishte rënë në pellg një herë pasi që ishte shumë i emocionuar në lidhje me ta”.
“Ne e pastruam pellgun tonë dhe Morty e pa se sa i cekët ishte uji në të. Ai shikoi drejt pellgut për një kohë. Ai sillej furishëm rreth pellgut duke i kërkuar peshqit e tij. Ne mendojmë se ai ishte i shqetësuar për të”, vazhdoi ai.
Pamjet emocionale tregojnë qenin duke rënë në panik pasi që nuk mund t’i sheh shokët e tij të ngushtë në ujë.
Video në TikTok përfundoi në një mënyrë dramatike, me shikuesit që ndanë dhimbjen e tyre me Morty-n.
“Ju lutem, kthejini peshqit menjëherë”, shkroi një prej tyre, përderisa një tjetër tha: “Kthejini peshqit ose unë do e thërras policinë”.
“Pellgu tani është pastruar, dhe shokët e Morty janë rikthyer sigurt në shtëpinë e tyre” bëri të ditur pronari i tij. /Telegrafi/