Sindikata e Pavarur e të Punësuarve në Komunën e Mitrovicës së Jugut ka reaguar pas njoftimit nga Qeveria e Kosovës se do të ndajë paga shtesë për punëtorët e arsimit.
Sipas tyre, kjo shtesë duhet të ndodhë për të gjithë punëtorët e shërbimit civil, në të kundërtën, sipas tyre, ata do të hyjnë në grevë dhe nuk do të dalin në votime për zgjedhje.
“Sindikata e Pavarur e të Punësuarve në Komunën e Mitrovicës së Jugut reagon, për lajmin e dhënë nga Qeveria në detyrë që të ndajë paga shtesë vetëm për punëtorët e arsimit e jo edhe për shërbyesit civil, kur dihet që shërbyesit civil kanë punuar prej fillimit të pandemisë pandërprerë dhe se ka një numër shumë të madh të infektuarish nga stafi i shërbyesve civil si dhe orari është më i gjatë 8 (tetë) orë që edhe gjasat janë më të mëdha që të ketë të infektuar në radhët e tyre. Paga shtesë, shërbyeseve civil ju takon edhe në bazë të Programit për Rimëkëmbje të Ekonomisë 2021, ‘Masa 6 – Sigurimi i shtesës mbi pagë për sektorët që bartin barrën kryesore në menaxhimin e pandemisë e që janë të ekspozuar drejtpërdrejt rrezikut të Infektimit me COVID-19’, e që nënkupton se stafi i shërbyesve civil është i ekspozuar rrezikut të infektimit. Sindikata e Pavarur e të punësuarve në Komunën e Mitrovicës, kërkon nga Qeveria në detyrë që të ndajë paga shtesë edhe për shërbyesit civil, në të kundërtën do të hymë në grevë si dhe nuk do të dalim në votime më 14.02.2021”, thuhet në reagim, përcjell Telegrafi.
Kryeministri në detyrë Avdullah Hoti pas takimit me përfaqësuesit e Sindikatës së Bashkuar të Arsimit, Shkencës dhe Kulturës (SBASHK), u ka siguruar që do të ndajë paga shtesë për punëtorët e arsimit.
Ndryshe, SBASHK-u kishte kërkuar nga Qeveria ta mbështesë sektorin e arsimit me para shtesë, për shkak të rrezikshmërisë nga coronavirusi. /Telegrafi/