Organizata Iniciativa për Progres (INPO) sot publikon raportin vjetor “Indeksi i kënaqshmërisë së qytetarëve me shërbimet komunale në Prishtinë”.
INPO ka dizajnuar raportin duke bërë matjen e kënaqshmërisë së qytetarëve në 15 fusha të shërbimeve komunale, bazuar në indikatorë matës për secilën fushë dhe shërbim.
Indeksi synon që në baza vjetore të skanojë kënaqshmërinë e qytetarëve me performancën e komunës, rezultatet e të cilit do të ndikonin në prioritizimin e politikave investuese dhe ngritjen e cilësisë së shërbimeve komunale.
Këtë vit do të publikohet edicioni i tretë i raportit vjetor të “Indeksit të kënaqshmërisë së qytetarëve me shërbimet komunale në Prishtinë”.
Panelistë në këtë konferencë do të jenë përfaqësues nga Ministria e Administrimit të Pushtetit Lokal, kryetari i Komunës së Prishtinës, Shpend Ahmeti si dhe kryesuesi i Kuvendit Komunal, Agim Kuleta.
Konferenca do të mbahet nga ora 10:00 në Hotel “Sirius” në Prishtinë./kp/