Ditë më parë u publikua një xhirim, në të cilin një person e sulmonte ikonën e filmave aksion, Arnold Schwarzenegger.
Aktori i famshëm hollivudian qëndronte në Afrikën e Jugut dhe po xhironte me telefonin e tij, ndërkohë që dikush e ka goditur nga prapa me të dyja këmbët.
Tash është publikuar edhe një xhirim i ri nga një kënd tjetër, me ç’rast shihet goditja e fuqishme që ushtrohet mbi Schwarzeneggerin dhe në atë moment personi rrëzohet, ndërsa menjëherë intervenon sigurimi.
Nuk dihet arsyeja e këtij sulmi që i ka shqetësuar fansat, ndërsa derisa stafi i sigurimit e ka larguar personin që e bëri këtë veprim, ai është dëgjuar duke thënë: “Më ndihmoni, më duhet një Lamborghini!”.
Sulmi ndaj 71-vjeçarit ka ndodhur në evenimentin sportiv “Arnold Classic Africa”, në Republikën e Afrikës së Jugut. /Telegrafi/
