Simone Inzaghi ka pranuar se rënia e formës së Marcus Thuram ka të bëjë me një problem në kyçin e këmbës.
Sulmuesi francez ka luajtur me ndihmën e qetësuesve dhe injeksioneve për të mbështetur Interin gjatë kësaj faze vendimtare të sezonit.
Thuram, i cili ka qenë sulmuesi më pjellor i Interit këtë sezon, ka luftuar me një dëmtim që preku paraqitjet e tij.
Problemi filloi më 10 shkurt, kur ai u detyrua të largohej nga ndeshja kundër Fiorentinës. Megjithëse u rikthye shpejt, duke luajtur edhe kundër Juventusit, dëmtimi ka ndikuar qartë në formën e tij.
Në 13 paraqitjet e tij në vitin 2025, Thuram ka shënuar vetëm dy gola, duke përfshirë edhe një gol kundër Feyenoord në Ligën e Kampionëve javën e kaluar. Megjithatë, ai ka treguar shenja të qarta se problemi i tij nuk është zgjidhur plotësisht.
Trajneri i Interit, Simone Inzaghi, këtë gjë e ka pranuar edhe në konferencën e fundit për shtyp.
“Thuram po lufton me një problem që një muaj tashmë. Ai nuk mund të stërvitet si dikur dhe ka luajtur me qetësues dhe injeksione. Ai është një profesionist i madh dhe na ndihmon gjithmonë, por ne duhet të vlerësojmë situatën”, deklaroi trajneri. /Telegrafi/