Partia Socialdemokrate përmes një komunikate të bërë për media ka kërkuar që të zbardhet fati i personave të pagjetur.
Në komunikatë thuhet se Dita Ndërkombëtare e të Pagjeturve, Kosovën e gjen të lënduar e me plagë të hapur.
“Sot është Dita Ndërkombëtare e të Pagjeturve. Kjo ditë Kosovën e gjen të lënduar e me plagë të hapur. 20 vjet pas luftës Kosova vazhdon të mos ketë kurrfarë përgjigje për 1562 qytetarë të saj. Serbia vazhdon obstruksionet e saj me pjesën më të ndjeshme të shoqërisë.
Përdorimi si levë kushtëzuese i fatit të pagjeturit përbën politikë antihumansite dhe mungesë vullneti për fqinjësi të mirë e bashkëjetesë. Zbardhja e fatit të të pagjeturve dhe vendosja e pakushtëzuar e drejtësisë është kushti themelor për normalizimin e marrëdhënieve”, thuhet në komunikatë, transmeton Telegrafi.
Partia Socialdemokrate thotë se është me familjet e atyre që ende nuk e kanë një përgjigje për më të dashurit e tyre.
“Në secilën situatë dhe kudo që jemi do të angazhohemi që fati i tyre të zbardhet dhe përgjegjësia të mbahet”.
Dita Ndërkombëtare e të Pagjeturve në Kosovë është shënuar edhe me një protestë paqësore e organizuar nga shoqata “Ngritja e Zërit”, dhe po ashtu është promovuar një libër me rrëfime të familjarëve të të zhdukurve ”Të jetosh me kujtimet e të pagjeturve”.
Qendra Burimore për Persona të Zhdukur në Kosovë kërkon edhe 1653 persona, fati i të cilëve ende nuk dihet. /Telegrafi/