Protestuesit e mbledhur të hënë në Tiranë për vrasjen e 7-vjeçares Avdia, më të paktë në numër se protesta e një dite më parë e përfunduan marshimin përpara Kryeministrisë.
Pjesëmarrësit përsëritën thirrjet drejtuar kryeministrit për shkarkimin e ministrave Çuçi dhe Kumbaro.
Ilirjana Kuçana, pedagoge, e afërme e 7-vjeçares telefonoi live kryeministrin Edi Rama për t’i parashtruar kërkesat e protestuesve, por ai nuk u përgjigj. Ajo lajmëroi nisjen e një peticioni online dhe fizik për t’i kërkuar kryeministrit të shkarkojë ministrat e tij.
“Do të vazhdohet të kërkohet drejtësi për Jonadën në institucionet ndërkombëtare. Do të ndërmarrim një peticion online dhe fizikisht duke i kërkuar kryeministrit të shkarkojë ministrat Çuçi dhe Kumbaro. Këtë e bëjmë për Jonadat e tjera. A duhet të mbajë dikush përgjegjësi për çdo njeri që vritet nga uniformat e shtetit, nga kryeministri”, tha Kuçana.
Më 2 gusht, ish-shefi i Komisariatit të Himarës, Arjan Tase përplasi për vdekje 7-vjeçaren Avdia, teksa kryente manovra të rrezikshme me skaf në plazhin e Potamit në Himarë.
Ai ishte efektiv policie dhe u përjashtua nga rradhët e policisë nga Drejtori i Përgjithshëm, Gledis Nano.
Në lidhje me këtë ngjarje të rëndë, Gjykata e Vlorës ka dhënë masën e sigurisë arrest me burg për ish-efektivin Arjan Tase.
