Rreth 1200 qytetarë janë nisur nga selitë e Partisë Demokratike (PD) dhe të Lëvizjes Socialiste për Integrim (LSI) në qytetin e Beratit drejt Tiranës, për t’iu bashkuar protestës së dhjetë në radhë të opozitës joparlamentare.
Mësohet se nën organizimin e përfaqësuesve të PD-së dhe të LSI-së për Qarkun e Beratit, janë nisur 4 autobusë dhe dhjetra automjete me simpatizantë të subjekteve përkatëse politike.
Sipas informacionit të komunikuar nga kreu lokal i PD-së, Gazmend Azizi, numri i simpatizantëve të demokratëve që i janë drejtuar Tiranës për të protestuar në sheshin para godinës së Kryeministrisë arrin në rreth 900 persona, ndërsa nga LSI-ja konfirmohet një numër prej rreth 300 protestuesish.
Sikurse ka ndodhur edhe në protestat e mëparshme, përkrahësit e PD-së do të mblidhen në selinë qendore blu për të marshuar të prirë nga kreu Lulzim Basha drejt institucionit qeveritar, shkruan Lapsi.al.