Me kërkesë të Ushtruesit të Detyrës së Kryeprokurorit të Shtetit, Besim Kelmendi, kryeprokurorët e të gjitha prokurorive të vendit kanë caktuar koordinatorët për veprat penale kundër integritetit seksual.
Sipas një njoftimi për media, bëhet e ditur se gjithashtu, koordinator përgjegjës për të gjitha prokuroritë është caktuar një prokuror në Zyrën e Kryeprokurorit të Shtetit.
Siç bëhet e ditur në njoftim, qëllimi i caktimit të koordinatorëve është që këto raste të trajtohen me prioritet të shtuar gjatë punës së institucionit të Prokurorit të Shtetit dhe rrjedhimisht të koordinohet puna për trajtimin sa me efikas të këtyre rasteve në të gjitha fazat e procedurës penale.
Ndryshe, ditëve të fundit në vend janë raportuar disa raste të ngacmimeve dhe dhunës seksuale, për çka ka pasur reagime të shumta nga institucionet vendore, shoqëria civile dhe nga qytetarët. /Telegrafi/