Prokuroritë publike të Kosovës kanë dështuar në luftimin e korrupsionit, ndërkohë që kanë shënuar sukses në realizimin e lëndëve duke zgjidhur 76% të tyre, ka deklaruar Kryeprokurori i Shtetit, Ismet Kabashi, gjatë prezantimit të raportit për punën e prokurorive publike për vitin 2009.
Duke prezantuar raportin për punën e prokurorive publike të Kosovës gjatë vitit 2009, kryeprokurori i shtetit, Ismet Kabashi, më shumë ka folur për problemet me të cilat ballafaqohen prokuroritë e Kosovës, ku kryesori sipas tij është numri i vogël i prokurorëve.
Duke u ndalur të çështja e korrupsionit, kryeprokurori Kabashi, tha se këto lëndë kryesisht janë në kompetencë të Prokurorisë së Qarkut në Prishtinë e cila gjithashtu kryen mbi 52 % të të gjitha rasteve në nivel të vendit.
Sipas tij gjatë vitit 2009 kjo Prokurori ka funksionuar me tre eventualisht katër prokuror, që janë pak në krahasim me fluksin e lëndëve. Mirëpo, sipas kryeprokurorit Kabashi, për sa i takon lëndëve të tjera është arritur sukses pasi 76% e numrit të përgjithshëm të lëndëve janë zgjidhur.
Ministri i Drejtësisë Haki Demolli, pasi e ka vlerësuar të rëndësishëm raportin, tha se ministria e tij tashmë ka përgatitur Projektligjin për Prokurorinë e Shtetit, që i ka munguar Kosovës, si një nga ligjet bazike.
Po kështu ministri Demolli tha se është hartuar edhe projektligji për Këshillin Prokurorial.
Në këtë prezentim ishte paraparë edhe pjesëmarrja e kryeprokurorit të EULEX-it, Johan Van Vreesëijk, por në vend të tij erdhi prokurori Kurt Jakob Myller.