Prokuroria Themelore në Pejë ka nisur hetimet lidhur me vdekjen e foshnjës katër muajshe në fshatin Serbobran të Istogut.
Foshnja e cila kishte ndërruar jetë rreth një muaj më parë (8 gusht 2022), është zhvarrosur të hënën dhe trupi është dërguar në Institutin e Mjekësisë Ligjore për obduksion.
Kështu ka bërë të ditur për Telegrafin zëdhënësi i Prokurorisë Themelore në Pejë, Shkodran Nikçi.
“Prokuroria Themelore në Pejë, Departamenti i Krimeve të Rënda, ka lëshuar urdhëresë që të bëhet zhvarrosja ( e cili ka ndodhur dje) dhe trupit të pajetë të foshnjës t’i bëhet obduksioni nga Instituti i Mjekësisë Ligjore në Prishtinë”.
“Gjithashtu janë duke u ndërmarrë veprime hetimore për t’u sqaruar të gjitha rrethanat e vdekjes së kësaj foshnje”, ka thënë Nikçi.
Lajmin për vdekjen e foshnjës e kishte konfirmuar për Telegrafin edhe Policia e Kosovës.
“Më datën 8 gusht 2022 rreth orës 04:50 policia ka pranuar një informatë se në fshatin Serbobran të Istogut një fëmijë 4 muajsh është pa shenja jete”.
“Njësitë relevante iu kanë përgjigjur vendit të ngjarjes, është informuar mjeku në QKMF-në e Istogut dhe i njëjti ka konstatuar vdekjen e foshnjës”, ka thënë zëdhënësi i policisë për rajonin e Pejës, Driton Rugova. /Telegrafi/