Më 24 shkurt të këtij viti, Gjykata Themelore në Gjakovë, ka marrë aktgjykim refuzues, në rastin ku Launor Berisha akuzohej për shitje të heroinës.
Aktgjykimi në fjalë ndaj Berishës është marrë pasi që prokurori tashmë i pensionuar, Ali Uka, në seancën e 24 shkurtit ishte tërhequr nga ndjekja penale dhe aktakuza, me arsyetimin se nga provat e administruara nuk ishte vërtetuar fajësia e të akuzuarit.
Tërheqjen nga ndjekja penale nuk e kishte kundërshtuar mbrojtësi i të akuzuarit, avokati Ndrecë Dodaj.
Sipas aktgjykimit të përpiluar nga gjykatësi Drilon Haraçia, thuhet se meqenëse prokurori është tërhequr nga ndjekja penale dhe aktakuza gjatë shqyrtimit gjyqësor në fjalën përfundimtare, gjykata në kuptim të nenit 363, paragrafi 1, nënparagrafi 1.1 të Kodit të Procedurës Penale, mori aktgjykim refuzues, meqenëse janë plotësuar të gjitha kushtet ligjore të parapara me këtë dispozitë ligjore, njofton betimiperdrejtesi.
Në aktakuzën e Prokurorisë Themelore në Gjakovë thuhej se më 10 janar 2020, i akuzuari Launor Berisha i ka shitur substancë narkotike të llojit heroinë Hasan Krasniqi.
Sipas aktakuzës, në ditën kritike, Hasani shkon tek shtëpia e të akuzuarit Launor në fshatin Rogovë të Gjakovës dhe prej tij blen narkotik të llojit heroinë, të përzier me paracetamol dhe kafeinë për shumën prej 80 eurosh dhe krejt këtë në bazë të raportit të ekzaminimit të kryer nga Agjencia e Kosovës për Forenzikë.
Për këtë, ai akuzohej se ka kryer veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge” nga neni 267, paragrafi 1 të Kodit Penal, vepër kjo që dënohet me gjobë dhe me burgim prej 2 deri në 8 vjet.