Në Prime Time të Kanal10, është diskutuar për shumëgjuhësinë në Kosovë.
Gjatë diskutimit, theksi është vendosur te programi i Ballkanistikës. Mësimi i gjuhëve të Ballkanit në kuadër të Universitetit të Prishtinës, u tha të jetë urë lidhëse mes komuniteteve që jetojnë në Kosovë dhe më gjerë.
Slavisa Mladenovic nga Zyra e Komisionerit për Gjuhët, ka thënë se programi i ballkanistikës në kuadër të UP-së do të ndihmonte në integrimin e njerëzve në shoqëri.
Ndërsa, Dekanja e Fakultetit Filologjik, Lindita Rugova, ka treguar se ky program mund të jetësohet gjatë këtij viti.
Sipas saj, në Kosovë duhet të organizohen konferenca që merren me gjuhët e Ballkanit, sepse siç ka thënë ajo, një gjë e tillë bëhet në vende të ndryshme të botës.
“Komunitetet nuk mund të integrohen në shoqërinë kosovare, pa mësuar gjuhët e njëri-tjetrit”, është shprehur ndërkaq Xhavit Rexhaj, zv/ministër në detyrë i Arsimit.
Njëjtë është shprehur edhe Mladenovic, i cili ka thënë se, njohja e gjuhës shqipe nga komunitetet pakicë është e vlefshme, po aq sa edhe njohja e gjuhëve të komuniteteve nga shqiptarët e Kosovës.