Profesori universitar, Behxhet Mustafa, ka bërë nderime për figurën e shquar në fushën e botanikës, akademikun Feriz Krasniqi, i cili ndërroi jetë në moshën 93-vjeçare.
Akademik Krasniqi, i cili shërbeu si udhërrëfyes shkencor dhe mësues i brezave të shumtë të studentëve, kujtohet nga prof. Mustafa si një titan i dijes dhe një ndërtaues i urave ndërmjet Kosovës dhe botës shkencore ndërkombëtare.
Ai tha se Feriz Krasniqi nuk ishte vetëm një intelektual dhe shkencëtar i shquar, por gjithashtu një dritë udhëzuese për të gjithë ata që kishin privilegjin të ndajnë hapësirën e tij akademike.
“Si doktori i parë i shkencave të botanikës në Kosovë dhe një ndër themeluesit e Universitetit të Prishtinës, ai la një trashëgimi të pasur që do të vazhdojë të frymëzojë dhe të ndriçojë rrugën për brezat e ardhshëm”, tha Mustafa.
Akademik Krasniqi, i cili ndërtoi herbarin e parë në vend dhe kultivoi një traditë të thellë botanike, mbahet mend për dedikimin e tij të palëkundur ndaj zhvillimit të dijes dhe shkencës, si dhe për aftësinë e tij të rrallë për të ndërtuar lidhje të forta me të tjerët.
“Ishte një njeri i cili qëndronte i ngrohtë dhe i qasshëm, duke lajmëruar miqësi dhe njohuri nga çdo qelizë e qenies së tij”.
“Ndikimi dhe kontributi i tij janë të matura jo vetëm nga studimet dhe botimet e tij të shumta, por edhe nga prekja personale që la në zemrat e atyre që e njohën” ,vazhdon Mustafa.
Mustafa vlerësoi lartë jetën dhe arritjet e akademik Feriz Krasniqi, duke shënuar një të kaluar të pasur dhe një trashëgimi që do të rrjedhë si burim frymëzimi për shumë kohë pas ndarjes së tij nga kjo botë.
FERIZ KRASNIQI- NJË BOTANIST I MADH
Njeriu i madh i familjes, dijes, shkencës dhe kombit akademik Feriz Krasniqi ka ndërruar jetë më 26.01 2024 në moshën 93-vjeçare.
Me ndrrim jete të Akademik Feriz Krasniqi kemi humbur shkencëtarin dhe intelektualin e përmasave, jo vetëm kombëtare, por dhe ndërkombëtare. Ishte doktori i parë i shkencave të botanikës në Kosovë. Është njëri nga profesorët e parë shqiptarë që ka filluar punën si mësimdhënës në Departamentin e Biologjisë, Universiteti i Prishtinës. Ishte një ndër themeluesit e Universitetit të Prishtinës, Ishte themelvënës i herbarit dhe profesor i shumë brezave në Departamentin e Biologjisë. Ishte shpallë dhe profesor emeritus nga rektorati i UP.
Të gjithë ata që kanë pasur fatin të bashkëpunojnë me prof Ferizin, në punë e projekte të ndryshme, i vlerësojnë lart angazhimet dhe kapacitetet e tij shkencore dhe intelektuale. Ishte njeri që komunikonte natyrshëm si me studentët ashtu dhe me kolegët. Profesori ishte një person që kur qëndroje me të, rrethoheshe nga shumë miq. Ishte një person që ngrohte me miqësi dhe dije në çdo pikë të horizontit. Ishte një person që notonte në detin e dijës, shkencës dhe miqësisë së pafundme. Ishte një sinonim i dijës, shkencës dhe miqësisë. Ai jepte dhe merrte dije e miqësi të pakufishme në një serr diellore. Ishte ndër ata që nuk kursente dijen, këshillat, ndihmën kur studenti, kolegu, miku ishte në nevojë. Ishte nga ata personalitete që sakrifikonte veten për të tjerët.
Kur kishe një hall, atë e kishe pranë, të rrinte afër. Ishe një njeri me mendje brilante, aftësi intelektuale të pashoq, zemër të kristaltë, me karakter të brishtë. Ishte një njeri me një ndershmëri shtatore, një krenari kombëtare, një dashuri arbërore, një kulturë admiruese, një modesti e rrallë. Ishte një njeri që u dhuronte dituri, mirësi e lumturi të tjerëve dhe s’kërkonte shpërblim. Një njeri që lumturia dhe dija e të tjerëve e bënte atë të lumtur. Një njeri tokësor, jo kozmik. Pra njeriu me këto cilësi ishe me një emër Feriz Krasniqi. Me fjalën e tij ëmbëlsonte çdo helmatisje të bisedave. Me kulturën dhe dijen e tij ndriçonte çdo problem profesional, shkencor dhe kombëtar. Ishte njeri që dinte të notonte në oqeanin e diturisë në të gjitha thellësitë.
Me punën e tij shkencore-hulumtuese ka kaluar kufijtë e vendit dhe rajonit. Puna e tij hulumtuese është finalizuar me botimin e artikujve të tij shkencor në të gjitha revistat e akademive të shkencave nga ajo e Sllovenisë deri në Maqedoni, por dhe në revista tjera prestigjioze më gjerë në rajon. Në këta artikuj janë prezantuar të dhëna të reja për herë të parë për shumë lloje dhe bashkësi bimore. Disa lloje dhe bashkësi bimore bartin dhe emrin e tij. Bashkëpunoi me shumë qendra dhe shkencëtar eminent të universiteteve të ndryshme. Në vitin 1980 së bashku me profesorin Wraber nga Lubjana arriti të zbuloj një lloj të ri bimor në Pashtrik që u emërtua Cynoglosum Krasniqi-Wraber. Lloj ky që rritet vetëm aty e askund tjetër në botë. Pastaj bashkësitë bimore Quercetum fraineto cerris scardicum Krasniqi, Polygalo-Forsythietum europaeae Bleçiç –Krasniqi etj.
Kur më së shumti ishte e nevojshme literatura në gjuhen shqipe profesori botoi tekstin “Sistematika e bimëve” recensent të së cilës ishin profesorët më të shquar nga Lubjana dhe Beogradi. Kjo na gëzonte dhe na bënte krenar kudo ku ne të rinjtë shkonim të studionim, kur na fliteshin për të si njëri dhe shkencëtar i rangut evropian. Kur rrinim me të na çlodhte, na optimizonte me ide dhe mesazhe. Sa më shumë rrinim pran tij zbulonte botën e tij shpirtërore, madhështinë e tij. Ishte puna e tij, sjellja dhe fjala e tij që na bënte të ndiheshim të nderuar dhe privilegjuar kur ishim pran tij. Në arkivin e tij mund të gjesh një mozaik mirënjohjesh të institucioneve arsimore, edukative, shkencore, qeveritare. Ishte një shkencëtar që i ka dhënë shumë shkencave të biologjisë. Në botë dihet se botanisti më madh i të gjitha kohërave ishte Karl Line, quhet dhe baba i taksonomisë. Dihet botërisht se botanisti më i madh i të gjithë brezave në Kosovë është prof Feriz Krasniqi, prandaj me plot të drejtë mund të quhet baba i botanikës në Kosovë apo Karl Lineu i Kosovës.
Njeri që ishte i mirëpritur kudo në çdo institucion të Kosovës. Jo rastësisht ishte prorektor dhe rektor i Universitetit të Prishtinës në vitet më të bujshme të këtij universiteti, jo rastësisht u zgjodh akademik i rregullt i ASHAK si dhe anëtarë i kryesisë së Kosovës për tetë vite në vitet e shtatëdhjeta dhe fillim të tetëdhjetave. Me angazhimin e tij deri në fund të jetës i papërtuar, sfidonte moshën, vitet e fundit të jetës, shkruante, botonte artikuj dhe libra shkencor, fjalor terminologjik, kumtesa.
Ishte idealist dhe aspak materialist. Profesori kudo ku shkoi shndriti, si student i rregullt në Universitetin e Shkupit, si doktorantë në Universitetin e Beogradit ku me sukses të lartë mbrojti tezën e doktoratës para pesë anëtarëve më të shquar të shkencës në fushën e taksonomisë në ish jugosllavi, si nga Universiteti i Beogradit, Lubjanës, Zagrebit, Sarajevës, Shkupit, shndriti si profesor në Universitetin e Prishtinës dhe si akademik. Ndërrimi jetë i profesor Ferizit për të gjithë ne është humbje e madhe. Familja e profesor Ferizit, ish studentët dhe brezat e rinj që lexojnë për punë dhe veprën e tij, kolegët do jen krenar për të për jetën e jetës. Lavdi punës dhe veprimtarisë së tij./Telegrafi/