Prodhimet e vendit po vazhdojnë të hasin në probleme të mëdha për të siguruar treg të shitjes brenda Kosovës, raporton KTV.
Ka kohë që shumë prej bizneseve të sektorëve të ndryshëm kanë kërkuar mbrojtje më të madhe të tyre.
Një prej sektorëve që ka përfituar shumë si nga institucione vendëse ashtu edhe ato ndërkombëtare, është sektori i bujqësisë.
Sipas ministrit Memli Krasniqi, shumë fusha të bujqësisë kanë arritur të kenë një rritje të prodhimit.
Megjithatë, Krasniqi pranon se prodhuesit po përballen me konkurrencë të fortë në treg, por thotë se edhe ata duhet të punojnë më shumë për të rritur kualitetin e produkteve të tyre.
Mirëpo, kështu nuk mendon Safet Gërxhaliu nga Oda Ekonomike e Kosovës.
I njëjti akuzon shumë prej hipermarketeve se po u vendosin kushte shumë të vështira bizneseve vendëse, në krahasim me prodhimet që vijnë nga importi.