Prodhuesi amerikan i çipave Intel Corp do të shpenzojë 25 miliardë dollarë për një fabrikë të re në Izrael.
Kjo është bërë e ditur nga kryeministri Benjamin Netanyahu, duke e quajtur atë investimin më të madh ndërkombëtar në vend, përcjell Telegrafi.
Sipas mediave, fabrika në Kiryat Gat do të hapet në vitin 2027, do të funksionojë të paktën deri në vitin 2035 dhe do të punësojë mijëra njerëz, tha Ministria e Financave e Izraelit.
Sipas marrëveshjes, Intel do të paguajë një normë tatimore prej 7.5%, nga 5%, shtoi ministria.
Gjatë pothuajse pesë dekadave të operacioneve të saj në Izrael, Intel është rritur për t’u bërë punëdhënësi dhe eksportuesi më i madh privat i vendit dhe një lider i industrisë lokale të elektronikës dhe informacionit, sipas faqes së internetit të kompanisë.
Në vitin 2017, Intel bleu Mobileye Global Inc me bazë në Izrael, e cila zhvillon dhe vendos sisteme të avancuara të ndihmës për shoferin, për 15 miliardë dollarë.
Në një deklaratë, Intel tha se operacionet e saj në Izrael kishin “luajtur një rol vendimtar” në suksesin global të kompanisë.
“Synimi ynë për të zgjeruar kapacitetin prodhues në Izrael drejtohet nga angazhimi ynë për të përmbushur nevojat e prodhimit të ardhshëm… dhe ne vlerësojmë mbështetjen e vazhdueshme të qeverisë izraelite”, thuhet në deklaratë. /Telegrafi/