Përdoruesit e serisë Google Pixel 6 janë përballur me probleme të ndryshme. Pritej që seria Pixel 7 të mos sillte probleme, por kjo nuk ndodhi.
Përdoruesit e telefonave të serisë Pixel 7 po përjetojnë probleme, megjithëse në një masë më të vogël se përdoruesit e telefonave Pixel 6.
Sido që të jetë, përdoruesit e të dy serive kohët e fundit kanë filluar të raportojnë probleme të reja, transmeton Telegrafi.
Problemet më të fundit që shfaqen në seritë e telefonave Pixel 6 dhe Pixel 7 lidhen me shkarkimin e shpejtë të baterisë dhe mbinxehjen e pajisjes.
Në të kaluarën, përdoruesit i raportonin këto probleme në Reddit, Twitter dhe forumin e mbështetjes së Google, kurse një numër në rritje përdoruesish po përballen me to.
Sipas një raporti nga Engadget, disa përdorues besojnë se këto çështje filluan të shfaqen pas përditësimit të aplikacionit Google që Google dërgoi më 12 maj. Rikthimi në versionin e mëparshëm të aplikacionit vetëm pak i lehtësoi këto probleme.
Disa përdorues kanë provuar të rivendosin telefonat e tyre në cilësimet e fabrikës dhe të riinstalojnë aplikacionet, por kjo nuk i ka zgjidhur problemet e tyre, duke çuar në shqetësime për dëmtimin e mundshëm të baterisë dhe CPU-së.
Përdoruesit që kërkuan ndihmë direkt nga Google hasën në mbështetje të kufizuar, dhe disa vunë re se kishin biseda të gjata dhe të padobishme me stafin mbështetës.
Edhe pse kompania amerikane duket se është në dijeni të problemit, ende nuk ka dhënë asnjë zgjidhje apo shpjegim. /Telegrafi/