Me gjithë vërejtjet në procesin e privatizimit të ndërmarrjeve shoqërore, deputeti i LDK-së, Muhamet Mustafa, ka thënë se privatizimi duhet të vazhdojë, me përjashtim të “Trepçës”, për të cilën, sipas tij, duhet një qasje e veçantë.
“Privatizimi nuk ka alternativë pasi shtetëzimi i të gjitha ndërmarrjeve të mbetura do të shkaktojë edhe më shumë rrëmujë, pasi shteti ka telashe me ndërmarrjet aktuale që i ka në menaxhim”, ka thënë Mustafa.
Fillimi i procesit të privatizimit, sipas tij, ka qenë një vendim i drejtë, mirëpo jo edhe mënyra se si është udhëhequr ai në kohën e Agjencisë Kosovare të Mirëbesimit (AKM) që ka qenë shumë e mbyllur e më vonë, shkruan sot Koha Ditore.
Për të shqetësuese është çmimi me të cilin janë shitur tokat. Ka thënë se dështimi i shtetit për të tërhequr investime të huaja ka bërë që shumica e privatizimeve të bëhen nga diaspora dhe afaristët e Kosovës të cilët kanë hyrë nëpër kredi të shtrenjta.
Kjo, sipas tij, ka ndikuar që shumica e afaristëve të mos kenë më burime të tjera të financimit për të investuar në ngritje e këtyre ndërmarrjeve. /Telegrafi/