Kamerat e sigurisë kanë kapur momentin kur dy persona të armatosur me armë të gjata, shtien mbi një veturë të policisë – pasi kishin organizuar një pritë, ku si pasojë është plagosur një prej policëve që ishte brenda mjetit.
Të shtënat ishin pjesë e një “rrjeti” të pritave të organizuara ndaj policisë komunale në Meksikë. Kamerat kapën momentin kur dy persona të armatosur me pushkë automatike fillojnë të shtien me armë mbi veturën e policisë në Tijuana, transmeton Telegrafi.
Madje njëri prej sulmuesve e shfrytëzon murin e një objekti si mburojë që të shpëtojë nga plumbat, që mund t’i vinin si kundërpërgjigje nga policia që ishte në veturë.
Mediat lokale raportojnë se njëri prej policëve ishte qëlluar në fytyrë dhe me urgjencë është dërguar në spital për trajtim. Deri më tani nuk dihen motivet e këtij sulmi.
Mirëpo raportohet se prita ishte organizuar, pasi policia pranoi një telefonatë për kinse tentim rrëmbim, por me të mbërritur në vendin e ngjarjes kishin hasur në breshëri plumbash. /Telegrafi/
