Prishtinë, fillon shpërndarja e kontejnerëve të rinj për mbeturinat inerte

Komuna e Prishtinës ka nisur shpërndarjen e kontejnerëve të rinj për mbeturina inerte në lagjet e kryeqytetit, si pjesë e përpjekjeve për të përmirësuar menaxhimin e mbeturinave dhe pastrimin e qytetit.

Kështu ka bërë të ditur kryetari i Prishtinës, Përparim Rama në një postim në “X”.

Rama, ka theksuar rëndësinë e këtij hapi për Prishtinën, duke e cilësuar atë si një tjetër masë për të arritur një ambient më të pastër dhe të shëndetshëm për qytetarët.

“Kemi filluar shpërndarjen e kontejnerëve të rinj për mbeturina inerte në lagjet e kryeqytetit! Edhe një hap tjetër i rëndësishëm drejt një Prishtine më të pastër”, ka shkruar Rama.

Ai ka falënderuar drejtorin e Shërbimeve Publike, Bekim Brestovci për punën e bërë.

Shpërndarja e kontejnerëve të rinj pritet të ndikojë pozitivisht në ambientin e qytetit dhe të lehtësojë procesin e mbledhjes dhe pastrimit të mbeturinave, duke kontribuar në përmirësimin e kushteve të jetesës për të gjithë qytetarët e Prishtinës. /Telegrafi/