Prishtina ka arritur të triumfojë në udhëtim në Prizren tek Liria falë një ndeshje fantastike nga mesfushori Endrit Krasniqi.
Ndeshja nisi me iniciativën e lehtë të Prishtinës në pjesën e parë ku kërkonin golin në fillim të ndeshjes.
E një gjëje të tillë bardh e kaltërtit ia arritën në minutën e 10-të nëpërmjet futbollistit të tyre më të mirë Endrit Krasniqi.
Krasniqi mori një top në mesfushë dhe me një goditje të saktë nga 25 metra mposhti portierin vendas Ruxhi.
Pas epërsisë së Prishtinës, vendasit morën iniciativë për ta barazuar rezultatin dhe një gjëje të tillë ia arritën në minutën e 36-të kur shënoi mbrojtësi Visar Berisha pas asistimit nga Liridon Fetahaj.
Me rezultatin e barabartë 1:1 përfundoi pjesa e parë.
Ashtu si pjesën e parë edhe të dytën Prishtina e nisi më mirë falë super mesfushorit Endrit Krasniqi.
Mesfushori i talentuar shënoi një gol tjetër spektakolar kësaj radhe nga gjuajtja e lirë në minutën e 49-të të ndeshjes.
Liria ka mundur të barazonte rezultatin pas një gabimi nga portieri prishtinas Alban Muqiqi por një gjëje të tillë nuk ia arritën.
Pas kësaj fitore Prishtina prinë në renditje pas dy javëve me pikë të plota gjashtë, ndërsa Liria mbetet pa pikë. /Telegrafi/