Prishtina ka shënuar fitore në shtëpi ndaj Llapit me rezultat 2-1 në kuadër të javës së 27-të të BKT Superligës së Kosovës.
Pas shumë zhurme në ditën e djeshme, ndeshja u vendos që të zhvillohej në “Fadil Vokrri”.
Prishtina ishte kthyer në shtëpinë e saj pas një muaji, ndërsa kjo i bëri mirë dhe e nisi ndeshjen me disa sulme.
Edhe Llapi kishte rastet e veta, por pjesa e parë nuk solli gola.
Me të filluar pjesa e dytë, Prishtina fitoi penallti, kur Sulley Sadam u pengua në zonë nga Benjamin Emini, ku gjyqtari akordoi penallti.
Nga pika e bardhë ishte i saktë Besnik Krasniqi që shënoi për 1-0 në minutën e 53-të.
Prishtina gjeti golin e dytë në minutën e 65-të, kur Sadam luan bukur me Endrit Krasniqin, ku ky del i vetëm me portierin dhe shënoi për 2-0.
Llapi arriti të hap ndeshjen në minutën e 78-të, kur Drilon Fazliu finalizon një aksion të bukur të mysafirëve për 2-1.
Në minutën e 90-të Llapi kishte rast të barazonte rezultatin, por goditja e Firminos u prit nga Eglant Haxho.
Dy minuta më pas edhe Valmir Veliu kishte rast të mirë, por gjuajtja e tij u ndal në shtyllë.
Prishtina pas kësaj fitoreje ka 35 pikë dhe mbanë vendin e pestë ndërsa Llapi mbetet i katërti me 41 pikë. /Telegrafi/