Kryetari i Komunës, Isa Mustafa tha se janë kryer të gjitha përgatitjet dhe komuna e ka ndarë buxhetin e nevojshëm për ndërtimin e sheshit.
“Është përfunduar projekti dhe periudha e tenderimit. Ne mendojmë se në fund të këtij muaji do të fillojnë punimet. Dëshirojmë që edhe sheshi t`i përngjajë veprës së Zahir Pajazitit, të jetë një shesh i admirueshëm ashtu siç është Zahiri i admirueshëm për të gjithë qytetarët e Prishtinës dhe Kosovës”, tha Mustafa.
Ndërkaq, bashkëluftëtari i Heroit Zahir Pajaziti, ish-komandanti i UÇK-së për Zonën e Llapit, Rrustem Mustafa-Remi, tha se komuna e Prishtinës është duke treguar respekt për dëshmorët dhe familjet e tyre.
“Sot hapur po e njohim punën e Komunës së Prishtinës e cila në veçanti ka bërë për luftëtarët e lirisë dhe vlerat e luftës sikur në ndarjen e trojeve në shtëpitë dhe përkujdesjen e për luftëtarët e dëshmorët e deri te ndërtimi i sheshit ‘Zahir Pajaziti’, i cili është më i madhi deri më tani”.
Ai tha se me ndërtimin e sheshit të ri, do të ndërrohet edhe shtatorja e re e Zahir Pajazitit, së cilës do t’i ruhen elementet heroike.
“Ka shumë kërkesa nga komunat e Kosovës që shtatorja ekzistuese e Zahir Pajazitit të shkoj nga këtu. Do të jetë një përmendore e re, por do të jetë duke e ruajtur simbolikisht armën e tij dhe vizionin për çlirimin e vendit”.
Në kuadër të Ditës së Çlirimit të Prishtinës, kryetari i komunës Isa Mustafa ka bërë homazhe në Varrezat e Dëshmorëve dhe te varri i ish presidentit Ibrahim Rugova. Ndërkaq, aktivitetet përmbyllen me koncertin festiv që organizohet në mbrëmje në Sheshin ”Nënë Tereze”.