Prishtina ka triumfuar në derbin e javës së 11-të në elitën e futbollit kosovar, ku ka mposhtur Dritën me rezultat minimal 1-0.
Ndeshja nisi qetë me dy skuadrat që nuk rrezikonin shumë.
E rasti i parë në këtë takim u pa në minutën e 17-të dhe i takoi vendasve.
Ishte Meriton Korenica që gjuajti fuqishëm nga ndërprerja por fillimisht intervenoi Tofiloski e pastaj topi u ndal nga shtylla.
Prishtina ishte më e rrezikshme dhe pati edhe dy mundësi tjera në 45 minutat e para me Ergyn Ahmetin e Armend Thaqin, por që asnjëri nuk arritën të shënonin gol.
Kësisoj 45 minutat e para të derbit përfunduan ashtu siç filluan pa gola 0-0.
Edhe pjesa e dytë ishte në favor të prishtinasve, të cilët rrezikuan me Korenicën, por që goditja e tij u prit nga Tofiloski.
Gauthier Mankenda e Ardit Hila patën raste të tjera shënimi, por pa sukses.
E goli i shumëpritur për vendasit erdhi në minutën e 82-të, kur Mankenda asistoi për mrekulli te Thaqi i cili shënoi në portën e zbrazët për 1-0.
Thaqi kishte një rast tjetër për ta ngritur epërsinë në 2-0, por gjuajti jashtë portës i vetëm përballë portierit mysafir.
Drita tentoi të shënonte golin e barazimit në minutat e mbetur, por një gjëje të tillë nuk ia arritën.
Me këtë fitore Prishtina ngjitët në pozitën e katërt në tabelë me 20 pikë të tubuara, një më pak se Drita e pozitës së tretë dhe katër më pak se lideri Gjilani.
Prishtina në takimin e ardhshëm do ta luaj derbin kryeqytetas ku përballë ka Flamurtarin dhe luan përsëri në stadiumin Fadil Vokrri.
Ndërkohë Drita do të luaj përsëri në udhëtim, pasi luan tek fqinjët e Ferizajt. /Telegrafi/