Ashtu siç edhe u prit, palestra sportive ’Tota’ ishte mbushur plot, ku tifozët e ekipit vendas ‘Forca’ ishin përkujdesur për një koreografi të shkëlqyer. Ata e mbështetën ekipin e tyre që nga fillimi i takimit e deri në fund, por as kjo nuk i ndihmoi Kosovës që të arrijë një fitore kundër Prishtinasve që kishin qenë të përgatitur maksimalisht.
Prishtina në këtë lojë u dallua me një lojë shumë dinamike dhe tejet të fortë në mbrojtje. Duhet të përmendim edhe portierët e Prishtinës që kanë ndaluar shumë sulme të vushtrriasve. Më meritori për mysafirët ishte Oltion Beshiri që shënoi 9 gola. Rezultati përfundimtar ishte 30:39 në të mirë të Prishtinës.
Prishtina tani ka arritur 10 fitore rresht dhe zë vendin e parë në tabelë.
Me datën 24 nëntor do të takohet me ekipin e Handball Esch nga Luksemburgu në rrethin e tretë të garave në Challenge Cup. Ndeshja e parë do të zhvillohet në Pallatin e Rinisë dhe të Sporteve në Prishtinë, me fillim nga ora 19:15. /Telegrafi/
