Familja Mbretërore Britanike mori pjesë të premten në koncertin tradicional të Krishtlindjes “Together at Christmas”, një nga angazhimet e para publike të Kate Middleton pas përfundimit të trajtimit të saj me kimioterapi.
Ndërkohë, vëmendjen e të pranishmëve e tërhoqi princi i vogël Louis, djali më i vogël i princit William dhe Kate, pasi fotografët kapën një moment të veçantë me një mesazh të shkruar me dorë për gjyshen dhe gjyshin e tij.
Përpara fillimit të koncertit, gjashtëvjeçari ndaloi te “pema e mirësisë”, ku të ftuarit ishin ftuar të varnin mesazhe falënderimi në kartolina për ata që i kishin mbështetur gjatë vitit.
“Faleminderit gjyshes dhe gjyshit që kanë luajtur me mua”, shkruhej në kartolinën e vogël të Louis-it.
Louis dhe vëllai i tij më i madh, princi George (11 vjeç), ishin veshur në harmoni me babanë e tyre, duke mbajtur kostume blu të errët, këmisha të bardha dhe kravata të kuqe.
Ndërkohë, princesha Charlotte (nëntë vjeçe) shkëlqeu me një fustan të kuq të errët që përputhej me veshjen elegante të nënës së saj, Kate Middleton.
Ky koncert tradicional jo vetëm që përcolli atmosferën festive, por shërbeu si një moment i veçantë bashkimi dhe mirënjohjeje për familjen mbretërore dhe të gjithë të pranishmit. /Telegrafi/