Zëvendëskryeministri i Qeverisë së Kosovës, Besnik Tahiri, ka prezantuar sot Projektligjin për Qeverinë, ku parashihen të jenë tre zëvendëskryeministra, 15 ministri, 2 ministri në diskrecion të mandatarit, rreth 40 zëvendësministra, si dhe rreth 250 këshilltarë politikë.
Tahiri ka thënë se ky Projektligj do të sjell organizim dhe funksionim më të mirë të Qeverisë.
“Projektligji parasheh 3 zëvendëskryeministra, 15 ministri, 2 ministri në diskrecion të mandatarit. Rreth 40 zëvendësministra, rreth 250 këshilltarë politikë dhe nën-punës të kabineteve. Nuk ka ministra pa portofol, Ndalohet krijimi i trupave shtesë me funksione paralale”, ka thënë Tahiri para mediave.
Në këtë projektligj janë paraparë edhe kufizimet e qeverisë në dorëheqje.
Po ashtu, në këtë projektligj trajtohet edhe parandalimi i konfliktit të interesit, ku anëtarët e qeverisë dhe zëvendësministrat nuk mund te ushtrojnë funksion tjetër publik përveç kur ai ushtrohet sipas detyrës zyrtare. Po ashtu, nuk mund të ushtrojnë asnjë funksion në pushtetin lokal dhe nuk mund të mbajnë asnjë marrëdhënie tjetër të punës në sektorin privat.
Tahiri gjatë prezantimit të Projektligjit për Qeverinë ka folur edhe sa i përket ligjit për paga.
“Tek ligji i pagave jam i shokuar me vendimin. Nuk po e komentoj vendimin e gjykatës, por mua më duhet të trajtoj ligjin që e kemi bërë. Nuk ka sindikatë që nuk është diskutuar për këtë ligj. Është një padrejtësi shumë e madhe për një numër të njerëzve. Këtë ligj kjo qeveri do ta merr me prioritetin më të madh. Do të bëjë çmos me e dërgua në Kuvend këtë vit”, tha ai. /Telegrafi/