Jehona Gjurgjeala dhe Egzon Gashi – janë dy ekspertët e arsimit të cilët nga sot zyrtarisht do të jenë pjesë e komisionit për përzgjedhjen e drejtorëve dhe zëvendës-drejtorëve të çerdheve dhe shkollave të Prishtinës.
Drejtoresha e Arsimit në Komunën e Prishtinës, Besianë Musmurati, ka thënë se të dy ekspertët janë ndër profesionistët më të mirë të fushës.
Ajo është shprehur e bindur që të njëjtit do të bëjnë punë të shkëlqyer së bashku me të gjithë anëtarët tjerë të komisionit.
“Njihuni me Jehonën dhe Egzonin, dy ekspertët e pavarur të arsimit që nga sot zyrtarisht do të jenë pjesë e komisionit për përzgjedhjen e drejtorëve dhe zëvendës-drejtorëve të çerdheve dhe shkollave të Prishtinës”, ka shkruar Musmurati në Facebook.
Jehona Gjurgjeala është themeluese dhe Drejtoreshë Ekzekutive e “Organizatës Kosovare për Talent dhe Arsim – TOKA”.
“Ajo ka përfunduar studimet bachelor dhe master në London School of Economics and Political Science. Jehona po ashtu ka përfunduar programin profesional ne Politika te Edukimit, nga Georgetoën University. Ajo ka përvojë mbi dhjetë vjeçare në pozita menaxheriale në ndërmarrje ndërkombëtare – me zyra në Oksford, Londër dhe Kopenhage”.
Ndërsa, Egzon Gashi është themelues dhe Drejtor Ekzekutiv i “Teach For Kosova”, organizatë joqeveritare e cila synon të përmirësojë cilësinë e sistemit arsimor në Kosovë.
“Egzoni ka studiuar marrëdhënie ndërkombëtare në Universitetin e Oxfordit, ka Master në Edukim në Johns Hopkins University, ku edhe aktualisht është duke ndjekur studimet e doktoraturës në Lidership dhe Sipërmarrje në Arsim”, ka përfunduar Drejtoresha e Arsimit. /Telegrafi/
