Me prezantimin e dëshmive materiale të Prokurorisë Speciale Publike në Gjykatën Penale të Shkupit, sot vazhdoi gjykimi për lëndën “Trajektorja” ku të akuzuar janë ish kryeministri Nikolla Gruevski, ish ministri i Transportit dhe Lidhjeve Mile Janakieski, ish zëvendëskryeministri Vlladimir Peshevski dhe ish drejtori i ndërmarrjes publike “Rrugët shtetërore”, Ljupço Georgievski.
Prokurorja Lile Stefanova lexoi stenograme nga Komisioni kuvendar për transport dhe lidhjeve. Në njërin prej tyre, deputeti i atëhershëm Jani Makraduli deputetëve ju thekson se shuma për ndërtimin e autostradave është tepër e lartë në krahasim me të njëjtat rrugë që janë ndërtuar në vendet fqinje. Këtu kanë reaguar Janakieski dhe deputetët e OBRM-PDUKM-së, të cilët kanë thënë se interesi bankar te fqinjët ka qenë 2.5%, ndërsa te ne kjo ka qenë 2%, përcjell Telegrafi Maqedoni.
Deputetët e shumicës së atëhershme kuvendare kanë replikuar edhe për shumën e ndërtimit të rrugëve, ku kanë cekur konfigurimin e ndryshëm të terrenit si arsyetim për “çmimin e lartë”.
Sipas akuzës së PSP-së të akuzuarit në gjysmën e dytë të vitit 2012 dhe gjatë vitit 2013 kanë ndërmarrë shumë veprime me të cilat në procedurën për zgjedhje të kompanisë për ndërtim të autostradës Milladinovci-Shtip dhe Kërçovë-Ohër i kanë shfrytëzuar dhe tejkaluar autorizimet e tyre. Me këtë ata i kanë shkaktuar dëm buxhetit prej së paku 155 milionë euro./Telegrafi/