Presidentja e Kosovës, Vjosa Osmani, ka shkëlqyer me një paraqitje të jashtëzakonshme në një darkë të organizuar nga Presidenti francez, Emmanuel Macron, në Pallatin Élysée në Paris.
Ky event, i mbajtur për krerët e shteteve të Frankofonisë, u shoqërua me një atmosferë të rëndësishme diplomatike, ku Osmani përfaqësoi Kosovën me dinjitet dhe klas.
Në disa fotografi të publikuara në rrjetet sociale, Presidentja Osmani u pa e veshur me një fustan kadife, të cilit i kishte dhënë një elegancë të veçantë.
Fustani kishte mëngë të gjata dhe një prerje të rafinuar te pjesa e krahërorit, duke i shtuar një prekje moderne dhe klasike njëkohësisht. Ngjyra e thellë e kadifes reflektonte sofistikim, ndërsa prerja e fustanit theksonte bukurinë natyrale të presidentes.
“Mbrëmë në Pallatin Élysée në Paris, në darkën e organizuar nga Presidenti Emmanuel Macron për krerët e shteteve të Frankofonisë,” shkroi Osmani në mbishkrimin e fotografive që ndau me ndjekësit e saj.
Kjo paraqitje elegante e Vjosa Osmanit jo vetëm që tërhoqi vëmendjen për stilin e saj, por gjithashtu shërbeu si një moment i rëndësishëm për përfaqësimin diplomatik të Kosovës në një event të përmasave evropiane. /Telegrafi/
