Presidentit kilian Sebastian Pinera i është shqiptuar një tiketë prej 2.800 eurove (3.500 dollarëve), pasi pozoi para aparatit pa maskë duke bërë selfie së bashku me një kalimtare rasti në një plazh, shkruan Reuters.
Pinera ka kërkuar falje për këtë veprim dhe më pas u ka bërë thirrje organeve kompetente që të ndërmarrin veprimet konform ligjit, pasi që fotografia iu publikua në rrjetet sociale këto ditë, transmeton Telegrafi.
Presidenti kilian ka shpjeguar se kishte qenë duke shëtitur në plazh në afërsi të shtëpisë së tij, kur një grua e cila e kishte njohur i kishte kërkuar të realizojnë një fotografi së bashku.
Në fotografi shihet se si presidenti dhe kalimtarja e rastit qëndrojnë shumë afër njëri-tjetrit, që të dy pa maska mbrojtëse.
Në Kili bartja e maskës është e obligueshme në hapësirat publike, e për shkelje të kësaj mase parashihen dënime të rrepta madje edhe me burgim. /Telegrafi/